खोटाङ । खोटाङमा ट्याक्टर दुर्घटना हुँदा चालकको मृत्यु भएको छ । खोटेहाङ गाउँपालिका–६ इन्द्रेणी पोखरीमा ट्याक्टर दुर्घटना हुँदा चालक सोही पालिका–३ सावाकटहरेका २९ वर्षीय पवन तामाङको मृत्यु भएको हो ।
खोटाङ बजारबाट रसुवातर्फ जाँदै गरेको ना ६ त २४६६ नम्बरको ट्याक्टर इन्द्रेणी पोखरीस्थित नेर्लामा बिहिबार दिउँसो सडकबाट करीब ५० मिटर तल खसेर दुर्घटना भएको थियो । उक्त दुर्घटनामा परी ट्याक्टरका चालक तामाङ गम्भीर घाइते भएका थिए ।
उनलाई उपचारका लागि धरान लानेक्रममा तामाङको बाटैमा मृत्यु भएको इलाका प्रहरी कार्यालय खोटाङ बजारले जनाएको छ । तामाङको शव पोष्टमार्टमका लागि इन्द्रेणी पोखरी ल्याइएको प्रहरीको भनाइ छ ।
ट्याक्टरमा चालक तामाङ मात्रै सवार रहेको इलाका प्रहरी कार्यालय खोटाङ बजारले जनाएको छ ।
