काठमाडौँ । आगामी २६ गतेबाट सार्वजनिक प्रदर्शनमा आउने फिल्म हो ‘परदेशी २’ र नारायण रायमाझीको निर्देशन रहेको फिल्मको नयाँ गीत ‘परदेशी छुकछुके रेलैमा’ बोलको झ्याउरे गीत सार्वजनिक भएको छ ।
निर्देशक रायमाझी, तेजेन्द्र गुरुङ, टिका पुन, देवी घर्ती र ममता गुरुङको स्वर रहेको गीतमा रायमाझीकै शब्द रहेको छ भने संगीत प्रेमदेव गिरीले दिएका छन् । फिल्मको केही दिन अगाडि सार्वजनिक ‘हिजो काम।।।’बोलको गीतले दर्शकबाट राम्रो चर्चा पाएपछि निर्माण युनिटले यो झ्याउरे गीत सार्वजनिक गरेको हो ।
गीतमा अभिनेता प्रकाश सपूत, अभिनेत्री केकी अधिकारीसँगै अर्का अभिनेता प्रशान्त तामाङको समेत अभिनय देख्न सकिन्छ । राजेश वंशल र नारायण रायमाझीको निर्माण रहेको फिल्ममा प्रकाश, केकी र प्रशान्तको अलावा वर्षा सिवाकोटी, दिलीप रायमाझी, नीर शाह, रमा थपलिया, सविन बास्तोला, देवेन्द्र बब्लुलगायतको अभिनय छ ।
फिल्मको कथा एवं पटकथा रमेश बिजीले लेखेका हुन् । मानकृष्ण महर्जनको छायाङ्कन रहेको फिल्मलाई दीर्घ खड्काले सम्पादन गरेका हुन् । फिल्मले युवापुस्तामा रहेको विदेश मोहको कथा विषयवस्तु बनाएको छ ।
