दुहबी । सुनसरीको दुहबी नगरपालिकाले दुहबीको सोनापुरमा खानेपानीको ट्याङ्की निर्माण गर्ने भएको छ । सोनापुर खानेपानी उपभोक्ता समितिले सोनापुरमा ४ लाख ५० हजार लिटर क्षमताको खानेपानी ट्याङ्की निर्माण गर्न मङ्गलवार शिलान्यास गरेको हो ।
१ करोड ४४ लाख ९३ हजार ८ सय ४५ रुपैयाँ बराबरको बजेटमा १८ महिना भित्र कार्य सम्पन्न हुने गरी निर्माण कार्य अगाडी बढाइएको दुहबीका नगरप्रमुख बेद गच्छदारले जानकारी दिए ।
पानी ट्याङ्की निर्माणको शिलान्यास गर्दै गच्छदारले दुहबी ८ र ९ मा सुद्ध खानेपानीको अभावमा रहेका जनतालाई कार्य सम्पन्न भए पछि ठुलो राहत मिल्ने बताएका छन् । दुहबीको १२ वटै वडामा खानेपानीको सहज व्यवस्थापन गर्ने लक्ष्य लिएर आफू अगाडि बढेको बताए । दुहबी औद्योगिक क्षेत्र भएकाले पानीको माथिल्लो सतह सुक्दै जाने र कलबाट आउने पानी पिउन लायकको नभएकाले खानेपानीको समस्या समाधान गर्न लागिपरेको गच्छदारले बताएका छन् । अब चाडै अर्को आयोजनाको निर्माण कार्य पनि सुरु गर्ने योजना रहेको जानकारी दिएका छन् । दुहबी वडा नम्बर १०,११,१२ र ७ मा खानेपानीको समस्या भएकाले समाधान गर्न आफू लागिपरेको बताएका छन् ।
सोनापुर खानेपानी उपभोक्ता समितिका अध्यक्ष ओम थापाले २०७४ मा सोनापुर खाने पानी उपभोक्ता समिति गठन गरेर जग्गा व्यवस्थापन र कार्यालयको लागी भवन निर्माण सम्पन्न भइसकेको जानकारी दिए । थापाले दुहबी नगरको सहयोगमा ४ लाख ५० हजार क्षमताका २ वटा बोरिङ निर्माण हुने र सोनापुर बासिले सहज रूपमा पानी उपभोग गर्न सक्ने बताएका छन् । कार्यक्रममा समितिका पूर्व अध्यक्ष दीपक राई, वडा नम्बर ८ का अध्यक्ष तारिक सरदार, ९ का अध्यक्ष मेहेदी हुसैन लगायतको उपस्थिति रहेको थियो।